La llectura, puru beneficiu pa la rapazada

Alcuérdome de rapacín los llibros que tenía adautaos a la edá, yeren títulos d’adultos que munches veces nun amosaben denguna conexón real col neñu que llevaba dientro. "La flecha negra", "Ivanhoe", "La islla’l tesoru"… y otros munchos qu’anque los rebaxaren pa pasar por xuveniles acababen cayéndote de les manes.

Dibes a les llibreríes y na mayoría nun teníen seición infantil y xuvenil. Caminares Xixón arriba y abaxo, caminares per Cimavilla o Xove, nun alcontrabes títulos afayadizos na mayoría los casos. De cuando en vez llegábate dalgún llibru de los Cinco o de Guillermu y sentíeste afortunáu por la suerte tan escaso.

Muncho cambiaron los tiempos anguaño onde tenemos delles llibreríes específiques pa cries/os o dalgunes d’adultos con apartaos pa la rapazada. Sumando too ello, tengo de facevos unes preguntes mui serio. ¿Vais colos neñes/os polo menos una vez al mes a les llibreríes? ¿Dexáislos qu’escargateen ente los llibros y seleicionen dalgún pa mercalu? ¿Sois conscientes del espoxigue de la imaxinación que fae la llectura, de la meyora nel llinguax que lleva innato, de la correición de les faltes na escritura que llogra…? ¿Tenéis a les/os fies/os apuntaes/os a dalguna de les biblioteques la ciudá?...

Falando de la casa, sedría bono dedica-y un tiempu a la llectura en familia, que la rapazada supiere que los adultos lleen con ellos, al mesmu tiempu, caún el llibru que quiera, que s’avezaren a que los llibros son un bien humán qu’ayuda a trabayar la mente, a enanchar el celebru, a ser feliz. Y nun taría mal qu’hubiere una biblioteca familiar colos llibros de caún y que quiciabes la rapazada lleere los de los adultos nun futuru non mui llonxano.

Tamos a piques d’entamar les clases y como padres resultaría estimulante que valorareis la llectura como dalgo fundamental, estudien ciencies o lletres, en cauna delles la comprensíon llectora sedría fundamental.

Suscríbete para seguir leyendo