Esto ye l´acabose

Pasare los dieciocho años, la univesidá llegó coles coses buenes y males, duldes enormes sobre ónde me llevaba la vida, miraes pa un futuru onde la democracia paecía ser l’únicu camín, esperances que mio madre nun tuviere como titulada universitaria, la dictadura tratábala como una menor d’edá que namái podía trabayar si’l maríu la dexaba, y él nun la dexó.

Yo vivía en Xixón, una ciudá abierta, que m’ufiertaba tolo que necesitaba, la folixa de Cimavilla, los cines del centru, cines y non multicines, San Llorienzu pa remoyar el branu, los merenderos de les afueres, el sentimientu d’asturianidá, la gaita que m’alloñaba d’un sur dominante, y amor, muncho amor cantábricu.

Agora toi nos sesenta y cuatro años, Xixón zarróse dafechu, tresformóse en cuestión de meses nuna ciudá murnia, onde unos once mil votantes manden más que la mayoría, la cultura y llingua asturianes vense estrozaes y marxinaes, la censura tornó como nel franquismu, asesinen toros, l’escesu de turistes róbanos la ciudá y la hostelería vese sobrevalorada pol gobiernu del conceyu. Y si falamos de la contaminación, esi velenu que se pensaba ganáu, agrandóse, Xixón pasó de ser una ciudá pal peatón a vese dominada polos coches, tornando de nueves a circular llibremente los más contaminantes.

Y si mos paecía poco, un intransixente averáu a los partíos que gobiernen Xixón, entra nun chigre pistola en mano, amenaza a los veceros, diz que yá ta bien de roxos y maricones. Esta ye la ciudá que nos ta quedando, d’una ciudá abierta y pacífica pasa a un ñeru de dictadores.

Alcuérdome cuando mio madre dicía aquello de que nesta vida había que vivir y dexar vivir, que la felicidá yera un bien tan pequeñu qu’había de compartilo ente toos. Más-y val nun llevantar de la fuxaca, nun-y paga la pena ver que nestos tiempos quien manda en Xixón ye la intrasixencia

Suscríbete para seguir leyendo