La gaita asturiana fai historia cola so primer promoción de titulaos superiores

Sonaron pieces de toa triba: tradicionales –como'l Floréu de Remis, o la muñeira de Barganaz acompañada al tambor–; otres de composición propia, con acompañamientu al pianu de Sonsoles Rodríguez Granda; obres con electroacústica, como “Xana” del profesor Jorge Carrillo, que de fechu foi la primer obra que s'oyó a les 9 de la mañana; o “Zero”, de María Mendoza, la obra obligada pa los trés alumnos. 

Y con esa espresión de versatilidá del instrumentu más asturianu roblábase “un día históricu”. El día nel que sonaron los conciertos finales de la primer promoción de gaita asturiana del Conservatoriu Superior de Música del Principáu d'Asturies “Eduardo Martínez Torner” (Consmupa). “El ramu a cuatro años d'estudios superiores y catorce años d'estudios oficiales”, cuntaba Daniel Meré, ún de los trés gaiteros protagonistes de la xornada. La promoción complétenla, amás, Marco Antonio Guardado del Valle y Fabián Fernández Fernández.

“Ye un día históricu porque remata un llargu procesu qu'entamó va más de 25 años cola introducción de les primeres escueles de música tradicional pa la formación de los gaiteros; depués siguieron los estudios reglaos de grau elemental y de grau profesional y agora, a lo último Asturies tien la so primer xeneración de gaiteros con titulación superior. Cola mesma consideranza qu'otres asemeyaes: cola consideranza que puede tener un tituláu n'arquitectura, un inxenieru o un violinista”, espresaba con emoción Fernando Agüeria. 

La titulación, que se llantó siendo conseyeru d'Educación Genaro Alonso, yera una deuda pendiente de la rexón colos sos músicos tradicionales y asina lo recalcó Agüeria. “Los estudios superiores fueron la reivindicación de delles xeneraciones de gaiteros y agora son una realidá. Namás se pidía que pudiéramos tener lo que los gallegos yá tienen dende va años, o los vascos, o los sevillanos, que va tiempu que tienen reconocida la so titulación n'Interpretación-Instrumentos de la música tradicional y popular”.

Daniel Meré Fernández, 25 años, de Bañugues, el más mozu de los protagonistes del día, dexaba claru'l so prestu pola xornada que taba viviendo y yera consciente dafechu de que “somos pioneros. Con esti pasu llogramos que s'asitie a la gaita asturiana al mesmu nivel d'esixencia que cualesquier de los demás instrumentos del Conservatoriu. Creo que ye daqué que de xuru da prestíu a la gaita y a los gaiteros”. Fabián Fernández, llanerense de 28 años, lleva estudiando música dende fai 24 años y tocando la gaita, en concretu, “22 o 23 años”. La d'agora nun va ser la so primer llicenciatura musical una y bones, mientres esperaba pol grau superior de gaita que nun llegaba, sacó la d'Historia y Ciencia de la Música. 

Sostien que nestos cuatro años de formación superior lo que pudo conseñar y facer ver a otros músicos ye que “la gaita nun ye un instrumentu menor, nin tien más nin menos llimitaciones que cualesquier otru”. Que-y lo digan a él, que tutela dos bandes, una d'elles una brass band onde la gaita sígue-y el pasu a los metales y la percusión. “Sabíemos dende'l primer día que tábemos abriendo güelga”, diz Fabián Fernández. 

El más veteranu de los casi acabantes de llicenciar ye Marco Antonio Guardado del Valle, un sotubarqués de 37 años que, lo que son les coses, foi profesor de Fabián Fernández y Daniel Meré nel grau profesional. “Esta xornada foi mui ilusionante y yelo más pol preste de titulame con ellos, que fueron los mios alumnos va años”, dicía Guardado, un gaiteru que mientres esperaba pol grau superior que nun llegaba titulóse en percusión. 

Los trés manifiesten, tamién, la necesidá de que la gaita siga avanzando como lo fadría cualesquier otru instrumentu. Y eso supon, insisten, que se dea a los titulaos una posibilidá de salida profesional asemeyada a la otros instrumentistes. “Tamos formaos al más altu nivel y fáltennos pasos por xubir”, dicen. Suañen con que se formen bandes de gaites oficiales pa músicos titulaos. “Igual qu'Asturies tien una OSPA, podría tener una banda de gaites; o orquestes profesionales qu'incorporen al nuesu instrumentu”. Ehí queda.