Roma gana terren en Les Regueres col entamu de la campaña arqueolóxica nel yacimientu de La Estaca

La campaña arqueolóxica braniza nel yacimientu romanu de San Martín de La Estaca, n'Andayón, nel conceyu de Les Regueres, abrióse esti día con cinco profesionales desentrastiando'l terrén y acutando la zona onde se van ampliar los sondeos. A lo llargo de les próximes selmanes y hasta'l 7 de setiembre, cuando remate, dirá incorporándose más personal a un equipu encabezáu polos arqueólogos Jorge Muñiz y Elías Carrocera y del que tamién formen parte los xeólogos Javier Olona y Jorge Gallastegui; Ángel Montero ta al frente del rexistru topográficu y Marta Corrada ye la restauradora. Una ventena d'espertos, de distintes especialidaes, van intentar asoleyar el pasáu romanu que s'escuende sol suelu de La Estaca y yá hacia'l final de les prospecciones van enseñar los sos afayos a los ciudadanos, entamando visites empobinaes pa ellos. 

Los nuevos sondeos nun van empezar hasta la selmana qu'entra. Va ampliase la zona escavada l'añu pasáu pa dexar a la vista tol sofisticáu sistema de calefacción del edificiu principal de la villa. Les prospecciones van espurríse hasta los 25 metros cuadraos que nunca s'afuracaron, nun área hasta agora inédita pa los arqueólogos, esplica Juan Muñiz. Esa superficie axúntase al centenar llargu de metros cuadraos nos que se concentraron los trabayos arqueolóxicos nos postreros cinco branos. 

El xacimientu romanu de La Estaca entá da pa muncho. En realidá, esti namás ye l'empiezu d'unes prometedores escavaciones a les que-yos queda muncho percorríu. "Tamos viendo una esquina de la construcción y cuandu menos hai trés edificios ensin escavar. D'esti (l'edificiu principal) llevamos escaváu namás un cuartu: hai parés con pintures y una parte que nun se tocó entá, con habitaciones, patios, la zona d'entrada… Ye un complexu bien grande, con 900 metros de planta la casa principal y más edificios de los que desconocemos el so usu", refier Juan Muñiz. 

El xeorradar y la prospección xeomagnética conseñaron la esistencia d'eses edificaciones y cuéntase con siguir afondando nel terrén pa comprobar de qué se trata ya intentar datales, confirmando o non el so orixe romanu.

El pasáu branu los trabayos nel yacimientu consiguieron confirmar que la villa romana disponía d'un fornu qu'alimentaba'l sistema de calefacción del complexu, asemeyáu a les glories castellanes. Colos trabayos d'esti mes d'agostu espérase poder dexar a la vista tol sistema de climatización. 

Sábese que la villa romana de La Estaca taba ocupada y en funcionamientu a finales del sieglu II y principios del III, una datación a la que los investigadores llegaron pola apaición d'un lladriyu selláu pol alfareru Licinius, que la so producción asitia precisamente nesi periodu. El mosaicu y los materiales cerámicos descubiertos en 1958 son posteriores y los historiadores féchenlos nos sieglos III ya IV. 

L'actual campaña arqueolóxica nel xacimientu de La Estaca ta financiada pola Asociación Amigos de la Villa de San Martín de La Estaca. A los fondos apurríos pola asociación axúntase una partida de 5.000 euros de los presupuestos asturianos y una ayuda pa investigación concedida a Juan Muñiz, de 6.500 euros. En total, espérase axuntar unos 25.000 euros para costear los trabayos, una cifra pa la qu'entá falta enforma, asina que los Amigos de la Villa de San Martín de La Estaca caltienen abierta la recaudación ciudadana, con iniciatives de les que dan cuenta puntualmente na so páxina de Facebook. 

La Estaca ye un yacimientu enllenu de futuru y posibilidaes, pero la so financiación apúrrese "añu a añu", indica Muñiz, y na so mayor parte cuerre al cargu de l'asociación. 

El Conceyu de Les Regueres alcordó apocayá adquirir la finca del yacimientu de La Estaca pa poder enseñar de forma permanente la villa romana y sobremanera l'espectacular mosaicu descubiertu en 2018.