La fonda La Cloya, el Casinu, el cine Rada y otres hestories n'imaxes del Grau del últimu sieglu

Un viaxe nel tiempu pa conocer cómo yeren antaño los parques de Grau, el mercáu, les principales cais de la villa, cómo trescurría la vida nelles, cómo se movíen y vistíen los sos vecinos, los edificios emblemáticos que yá nun tán y los que permanecen, o los establecimientos, pensiones, negocios y llinies de tresporte públicu que yeren populares y non tolos moscones pueden recordar yá anguaño. Saber de toos estos detalles ye posible al traviés de la magnífica fototeca del Muséu del Pueblu d’Asturies y de la colección d'imaxes sobre'l conceyu que guarda ente los sos fondos, de distintos autores y dómines, dalgunes de va un sieglu, otres d'inclusive más tiempu y otres de menos al corresponder a la segunda metá del XX. Ente les más llamatives por tola información qu'apurre sobre la dómina alcuéntrase una de 1918, obra de Celso Gómez Argüelles, que recueye la parada del autu públicu que diba en dirección a "Cangas de Tinéu". La sobrecarga del coche, los paxellos de los protagonistes, toos homes, y les característiques del propiu automóvil yá dicen enforma del momentu en que se tomó. Pero amás ta fecha delantre de la que foi una de les más emblemátiques fondes moscones, La Cloya, que'l so nome puede lleese sobre la especie de toldu o persiana que cubre los balcones. Los edificios de viviendes que se ven p'abaxo yá nun esisten, anque sí l'últimu primero de la rexa, que correspuende a la propiedá del gran palacete indianu d'El Capitolio, na zona d'Eulogio Díaz Miranda. 

Nos fondos del Muséu del Pueblu d’Asturies esisten delles imaxes nes qu'apaez el parque de San Antonio o parque d'Abaxo, colos sos cuidaos xardinos y amplies zones piatonales y d'ociu y col monumentu al marqués de la Vega de Anzo que se ve nel mesmu puntu onde asitia güei. Dos d'estes instantánees correspuenden a la colección Alarde y daten dambes de 1960. Una d'elles recueye al fondu l'edificiu del Casinu, una preciosidá tristemente sumida nos años setenta del sieglu pasáu. Na mesma apréciase como'l parque yera abiertu na so parte baxa y tenía salida directa a la carretera. 

De cuando nin el parque d'Abaxo nin el de Riba teníen la so estructura actual y entá nun se desenvolviera como tal la carretera xeneral ye otra de les instantánees, de 1920 y obra de Celso Gómez, d'un home que lleva una vaca y va acompañáu de dos neños. Ente les más antigües de les que se guarden alcuéntrase una de la colección del marqués de Santa María del Villar, de 1905, na que dos muyeres van a caballu o en pollín en dirección a la ponte de Peñaflor. Delantre d'elles un carromatu y nel mediu de la escena un coche de dómina, probablemente del fotógrafu. 

Más modernes son les de la cai Flórez Estrada y la gasolinera d'esti puntu y la qu'amuesa'l cine Rada, nel centru de la villa y yá desapaecíu. Dambes pertenecen, coles mesmes, a la colección Alarde.