El xuegu la culpa

Na adolescencia guardábemos silenciu, grande o piquiñín, nun fueres a incumplir los principios fundamentales del reinu. Con eso nun se xugaba, hasta calláu podíes atrayer miraes inquisidores. Sicasí, ente los demás había una solidaridá que nun s’alcuentra anguaño. El barriu El Carmen atopábase siempre coles puertes abiertes pa los vecinos con dificultaes.

Anguaño, con un capitalismu alloriante, l’egocentrismu pieslló puertes y ventanes a los demás y, lo qu’ainda ye peor, tresformónos en seres llibres de nun cargar coles culpes de los nuesos actos. Los inquisodores que nos xixilen nun ye poles penes ideolóxiques, non, son más de xulgar lo de ser más que tu, ser reis de les apariencies, cayimos nel xuegu que nos cataloga en clases sociales. Los poseyedores de les togues otiedores de la distribución de rentes señalarante como paries nel casu de que nun te dediques a aparentar o seyas de la clas baxo; pero si ven qu’aparentes o yes de la clas alto, felicidaes, nacisti col drechu a pisar a los demás.

Abondes veces les obligaciones pa colos otros faenos cayer n’erros bultables, col xuegu la culpa permítese atacar a lo xo a la víctima p’asina que nun te reclame responsabilidaes, que s’avergoñe sólo de pensar qu’hebio dalgún dañu imaxinariu.

Y el comodín del xuegu alcuéntrase en fuxir enantes que te reclamen reparaciones. Cuando tenten alcontrar al responsable, nun lu afayen per dengún llau, tocaría-yos investigar tiempu a esgaya y les perdies sedríen mayores que si lo dexen pasar.

Y nun lo duldes, si t’aseguren que debes dalgo, que tienes de facer un trabayu que nun te peta, niega que seyas tu del que falen, el desgaste de la persona que te lo achaca sedra mayor que la cara dura tuya.

Lleguemos a talos niveles de cinismu, la xusticia yá nun ye sólo ciega, ye tamién muda, sorda, manca, coxa…

Suscríbete para seguir leyendo