¿Cuánta población asturiana tien "bona o escelente" cobertura móvil? Esto diz un estudiu del Principáu

"Más del 92% de la población asturiana tien una cobertura de telefonía móvil ente bona y escelente, inclusive en gran parte de los conceyos allugaos na zona rural". Ye la conclusión que saca'l Principáu del "Drive test", un estudiu "pioneru" que permitió midir sobre'l terrén la calidá de la señal de los trés operadores de telefonía móvil con rede propia a lo llargo de más de 6.300 kilómetros de carreteres. 

El conseyeru de Ciencia, Innovación y Universidá, Borja Sánchez, y el director de Xestión d'Infraestructures de Telecomunicaciones del Principáu (Gitpa), Luis González, informaron esti día de les primeres resultancies d'esti analís, nel que se tienen chequeao 541 víes de la xeografía asturiana y que "ufierta per primer vegada un mapa real de la conectividá móvil na comunidá". 

Perriba, talo y como destacó Sánchez, midióse la calidá de la señal que reciben 927.000 persones, un 95% de la población asturiana que vive en más de 3.000 localidaes. Queden asina fuera del estudiu daqué más de 50.000 habitantes que viven n'árees alloñaes, mesmo qu'unes 170 poblaciones nes que nun se pudo midir nesta primer etapa.

"Si s'axunten los trés operadores y les tecnoloxíes 2G, 3G y 4G, la cobertura ye escelente (velocidá de tresferencia de 100 Megabytes) en 42 conceyos; bona (ente 30 y 100 Mb) en 23 conceyos, y regular o meyorable (10 Mb) en 13 conceyos", espliquen dende'l Gobiernu rexonal. El 92% de la población que se midió nesti estudiu -daqué más de 852.000 habitantes-, taría asitiada na tabla alta de cobertura : ente bona y escelente.

Más conclusiones del Principáu: l'estudiu permitió detectar, per primer vegada, ónde tien señal real cada compañía y afitar que la calidá de la cobertura camuda por mor del operador. Asina, hai zones onde toles compañíes funcionen d'un xeitu asemeyáu y otres onde un habitante va tener meyor o peor cobertura por mor de la empresa a la que contrate'l serviciu.

El Conseyeru de Ciencia, Innovación y Universidá señaló qu'esti estudiu abre un nuevu escenariu pa conocer y planiar les meyores que se deben aplicar al sistema de conectividá. “Esta ferramienta va sirvinos por que cada operadora vea cuáles son les zones con déficit de cobertura y tamién por que'l Ministeriu de Ciencia y Tecnoloxía conoza la situación real y lo beneficioso que sería l'entamu del roaming rural”, indicó Sánchez.

L'informe va tar disponible nun futuru pa la ciudadanía. El serviciu de Cartografía de la Dirección Xeneral d'Ordenación del Territoriu y Urbanismu collaboró pa facer accesibles más de seis millones de puntos al traviés del sistema Sitpa-Ideas (https://ideas.asturias.es/). La ferramienta dexa al usuariu restolar pel mapa d'Asturies y ver la calidá de cobertura na so localidá. 

Pal Principáu, señaló'l conseyeru de Ciencia, estos datos son fundamentales “pa ver cómo meyorar les telecomunicaciones con otros sistemes, como la conectividá vía satélite o la tecnoloxía 5G, que va permitir tamién ampliar la cobertura nel territoriu, non solo en núcleos urbanos”.

Precisamente la conectividá 5G ye otru de los parámetros midíos. L'estudiu amuesa qu'esta tecnoloxía yá se ta esplegando nuna ventena de conceyos, magar el nivel de cobertura inda ta aniciando. La empresa Eurocontrol, axudicataria del contratu, foi la encargada de les midíes con un procedimientu asemeyáu al qu'usa Google pa mapear el territoriu. Un vehículu con teléfonos intelixentes, escáner, ordenador y GPS encargóse de rexistrar la calidá de cobertura, velocidá de tresferencia d'archivos, velocidá de navegación per internet y calidá de streaming.

El proyectu enmárcase, rescampla'l Principáu, na Estratexa de Tresformamientu Dixital na que trabaya la Dirección Xeneral d'Innovación, que tien como oxetivu afitar o afayar planes estratéxicos en zones con deficiente cobertura y que les compañíes conozan les necesidaes del territoriu, en mires d'asitiase y ufiertar servicios.