Doce hoteles rurales a la venta nes Cuenques en plenu "boom" del pisu turísticu

Una docena d'hoteles y complexos turísticos de les Cuenques, la mayoría d'ellos, diez, del ámbitu rural, tan anguaño a la venta en distintos portales y axencies inmobiliaries. Un númberu importante, que confirma l'enclín asturianu xeneral, con un númberu al alza d'esti tipu d'establecimientos turísticos a la venta. N'Asturies son mediu centenar –más que nunca– los que s'ufierten. 

Dos factores paecen tar detrás d'esti aumentu de les ventes d'hoteles. Per un llau, les últimes repercusiones de la crisis del coronavirus, cola devolución de los creitos que se pidieron pa salvar aquella crítica situación. El segundu factor, al alza, según empresarios del sector, ye la puxanza de los pisos turísticos nel Principáu, un crecimientu nesta ufierta que coincide con un estancamientu del turismu rural del qu'Asturies foi pionera y que según les cifres que remana'l Sadei (Sociedá Asturiana d'Estudios Económicos ya Industriales) nun recuperó inda los niveles de 2019: 974.865 pernoctaciones naquel añu, poles 952.605 del añu 2023. Nesti mesmu periodu, les viviendes turístiques n'Asturies pasaron de 4.891 a 7.036, un aumentu del 44%, según datos oficiales del INE (Institutu Nacional d'Estadística). Un sector, el de les viviendes d'usu turísticu que, según el sector hoteleru, compite con ventayes al ser, hasta agora, un sector con una regulación muncho más floxa, con menor númberu d'obligaciones y costos llegales. 

De los doce hoteles a la venta nes Cuenques, trés atópense nel conceyu d'Ayer, trés en L.lena y otros cuatro en Casu. Ún ta en San Martín y otru, en Mieres. El de preciu más eleváu de toos, 1,9 millones d'euros, ye un complexu hoteleru en L.lena, con 30 habitaciones, que tamién tien restorán y parking con 60 places. Trátase d'un negociu en funcionamientu. 

Amás d'esta docena d'agospiamientos, tamién s'ufierten dos grandes complexos hoteleros. Ún d'ellos, El Urogallo, n'El Entregu, llegó a ser emblema de tou'l sector hosteleru de la cuenca del Nalón. Puede comprase por 500.000 euros, anque, según s'avisa nel anunciu, fai falta una reforma fonda pa que pueda volver funcionar. El segundu gran establecimientu hosteleru ta en Felechosa, tien dos enormes salones pa eventos y cuesta 900.000 euros. 

L'estancamientu del turismu rural n'Asturies coincide amás con un periodu de crecedera del númberu de visitantes pero que, al empar, gasten menos. Primero de la pandemia'l gastu diariu por turista n'Asturies andaba alredor de los 100 euros, según Sadei. En 2020 llegó al tope, 112 euros por persona, nun añu escepcional una y bones hubo munches menos pernoctaciones pol covid, y los que salieron de casa p'agospiase nos hoteles teníen un altu poder adquisitivu y apenes se viaxó fuera d'España. L'atracción d'esti tipu de públicu "que gasta" dineru ye tamién fundamental. Nel País Vascu, el gastu mediu por turista ponse en 121 euros. Curiosamente, nesta otra comunidá, tamién de la Cornisa Cantábrica, y tamién pionera del turismu rural, el númberu de pisos turísticos que s'ufierten incrementáronse a un ritmu mui inferior al d'Asturies: de 4.598 a 5.121, un 11% más, de la que nel Principáu crecíen el 44%. 

Va unes selmanes, amás, el Principáu aconceyó con una de les principales plataformes de reserves online, Booking.com, buscando la so collaboración na detección d'agospiamientos "pirata". Los hoteleros recuerden que, en cada reserva, estes plataformes cobren un mínimu del 17% del preciu de la pernoctación, siendo, asina, les empreses que más ganen col turismu n'Asturies. 

Los agospiamientos rurales, rexentaos por autónomos na mayoría de los casos, piden un apartáu concretu pa ellos, nel que les comisiones tean más amenguaes, lo qu'ayudaría a que los beneficios del turismu quedaren nos pueblos.

“Cola ayuda de la Conseyería de Cultura, Política Llingüística y Deporte del Principáu d´Asturies”.