Una "seña d'identidá" a puntu d'esbarrumbar

Primero de ser el barriu más pobláu d'Uviéu, La Corredoria yera una zona rural dafechu adscrita a la parroquia de Santuyanu. Hasta que llegaron les grúes y empezaron a llevantase edificios, namás había praos y caseríes alredor de l'antigua carretera d'Uviéu a Xixón. La única acordanza qu'entá pervive d'aquel pasáu rural son los trés horros asitiaos nel parque de La Cabornia, l'espaciu verde allugáu cerca de la estación del tren que separta'l barriu de l'autopista AS-II, pero esa ayalga patrimonial lleva demasiaos años en peligru de sumir comíu pol abandonu. "Lleven munchu tiempu prometiéndonos que se va a actuar pa remocicalos. El Conceyu yá nos dixo en delles ocasiones qu'había partíes económiques pa facelo, pero'l casu ye qu'inda nun se fixo nada y cualquier día caen embaxo", asegura Maite Orozco, qu'agora ye alcaldesa de barriu de La Corredoria y va aprovechar esi cargu pa volver pidi-y al equipu de Canteli qu'actúe cuanto primero. 

Los vecinos defenden que los horros del parque de La Cabornia son "una seña d'identidá" de La Corredoria, parte de la historia del barriu. Estes estructures tradicionales rescatáronse de dalgunes d'eses caseríes que sumieron tragaes pol formigón y el lladriyu d'ún de los núcleos poblacionales más grandes d'Asturies. Nel so día, según esplica Maite Orozco, el llevalos y asitialos "pieza a pieza" supunxo "una inversión económica importante" que podría echase a perder si nun s'actúa apriesa. Ello ye qu'ún d'estos horros sufrió una quema nel añu 2019 por cuenta d'un actu vandálicu ya inda sigue ensin remocicar. Hai que recuperalos, son la nuesa seña d'identidá", diz Orozco. 

De normal hai normes estrictes pal caltenimientu d'esti tipu de construcciones y los vecinos de La Corredoria quieren que los sos horros reciban el mesmu tratu. "Toos ellos presenten bien de daños, tán llenos de boza, tienen el teyáu en mui males condiciones y cualquier día van argayar", señala Jesús García Peón, que nel so día foi presidente de l'asociación vecinal Asparve, anguaño disuelta. El Conceyu yá contaba actuar pa recuperar los horros de La Corredoria en delles ocasiones. Les obres llegaron a tener un informe económicu completu sobre los costos. La intervención más complicada, evidentemente, sería la del que quemó, por que los trabayos xubiríen a más de 20.000 euros porque fai falta camudar, ente otres coses, ún de los frontales y la cubierta. 

Pero los vecinos nun piden namás una intervención darréu pa intentar salvar los horros del parque de La Cabornia, quieren que'l caltenimientu seya constante y que la Policía Municipal s'encargue de xixilar la zona por que nun se produzan acciones que puedan estropiar más entá'l conxuntu patrimonial. "Los rapazos métense dientro a facer lo que-yos da pola gana y depués pasa lo que pasa. Esa zona ye mui guapa y los horros tienen que tar cuidaos. Tampoco ye que pidamos gran cosa", sostien Maite Orozco.

“Cola ayuda de la Conseyería de Cultura, Política Llingüística y Deporte del Principáu d´Asturies”.