El covid que queda na punta de la llingua y dexa a les muyeres ensin palabres

Va casi un añu que les neuropsicólogues María González Nosti y Elena Herrera, profesores de Psicoloxía de la Universidá d'Uviéu, empezaron a sentir falar de pacientes arimaos de covid a los que, yá recuperaos, "nun-yos salen les palabres" o que sienten eso tan típico de que lo que quieren dicir quédayos "na punta de la llingua". Persones aparentemente yá curaes que nun atopen el nome de persones de la so familia o de la so redolada cercana, o qu'inclusive lleguen a tener dificultaes pa lleer o escribir. 

Entrambes, González y Herrera, atropen esperiencia investigando les alteraciones, especialmente del llinguaxe, en numberoses enfermedaes d'orixe neurolóxicu como l'Alzheimer o Párkinson. Asina que, llueñe de despreciar esos relatos qu'empezaben a venceyase al covid persistente, provocó-yos un "interés por conocer un pocu más toos estos síntomes pa poder cuantificalos y conocer si marcharíen nel curtiu o mediu plazu", espliquen.

A elles, eses secueles de falta de fluidez verbal, dificultaes pa l'atención y la espresión, amenorgamientu de la capacidá pa planiar, pa entamar o los lapsus de memoria, nun-yos abultaron insignificantes, "nin un cuentu pa espurrir una baxa", como saben que delles de les muyeres coles que falaron llegaron a escuchar de los sos médicos. A elles, n'oyendo cientos de casos, paez-yos qu'hai "un trestornu que se describe d'un xeitu bastante uniforme y concidente", diz María González Nosti.

Por muncho que nin en neuroimaxen nin en prebes cognitives básiques apruciera nenguna afectación -nos pocos casos en que s'investigaba'l relatu de les pacientes-, a les dos espertes abultó-yos que toes eses dificultaes nueves apuntaben a unes repercusiones cognitives qu'había que tener en cuenta. En revisando la lliteratura y ver que poco o bien poco s'escribiera al respeutive, decidieron encargase del estudiu.

"Tomámoslo como una investigación pequeñina, pa facer con 30 o 40 pacientes", recuerda María González. Pero al contactar cola Asociación Asturiana de Covid Persistente a la busca de casos llegó-yos un desboyu d'interesaes. Yera'l momentu en que se taben empezando a crear asociaciones de pacientes que se víen mui solos colos sos problemes y eso xenerara unes conexones increíbles de punta a punta d'España. Tan ansioses taben eses pacientes por que daquién amosara interés polo que-yos pasaba que-yos llovieron los casos d'estudiu. 

Hasta agora yá son más de 200 les pacientes evaluaes -mayoritariamente muyeres que s'arimaron na primer fola del covid- y cuenten algamar los 300 participantes. 

Lo que se busca, espliquen les investigadores, ye conocer el perfil cognitivu de los pacientes con covid persistente. Pa ello "aplicámos-yos un protocolu d'evaluación qu'inclúi xeres d'atención, memoria -de trabayu, visual, verbal y prospectiva-, llinguaxe -denominación, fluidez verbal, llectura y escritura- y funciones executives -inhibición de conducta, planificación, etc.-. Interésanos saber si hai un perfil cognitivu namás, con característiques asemeyaes na mayoría de pacientes o si pela cueta podemos atopar dellos perfiles distintos. Y, nesti casu, cuáles seríen les variables que lu determinen", esplica María González Nosti.

Ente los resultaos que yá tán claros alcuéntrase'l perfil básicu del paciente afectáu por covid persistente con estos trestornos: suel ser una muyer (88%), d'ente 40 y 60 años (44% de 40 a 49 años y 33% de 50 a 59), con un nivel educativu mediu-altu y que pasaron un coronavirus leve ensin necesidá d'ingresu hospitalariu. Ello ye que menos del 1% necesitaron ingresu. "L'amuesa ta formada mayoritariamente por muyeres que pasaron la enfermedá en casa y con síntomes leves. Son persones moces, con una media d'edá de 47 años, y lo que más nos ta chocando, por ser un datu cuantimenos alloriante, ye que les persones más moces son les qu'amuesen mayores dificultaes nes prebes neuropsicolóxiques", describe Elena Herrera.

Tamién tienen un estudiu mui preliminar colos resultaos de la afectación. "Ye solo una amuesa de los resultaos de 33 pacientes que se codificaron porque formaron parte d'un trabayu de fin d'estudios d'una alumna", avisa González Nosti. Nesti estudiu d'amuesa vese que la mayoría de los pacientes (el 78%) enseñen una velocidá de procesamientu más lento de lo normal; casi'l 40% amuesen dificultaes de razonamientu astractu; más d'un terciu amuesen dificultaes llingüístiques que se ven nes xeres de fluidez verbal en prebes del tipu "dígame a lo llargo d'un minutu tolos animales que pueda" o "dígame a lo llargo d'un minutu toles palabres que pueda qu'empiecen pola lletra P"; mesmo que dificultaes en distintos tipos de memoria, de trabayu y verbal principalmente y, a lo último, un 27% tamién amuesa dificultaes d'atención.

"Nesa amuesa, que ye bien pequena, tamién vimos que delles patoloxíes previes de los pacientes, como l'hipotiroidismu o la hipertensión ta rellacionada con un rendimientu baxu en delles de les prebes. Por casu, la hipertensión ta rellacionada con una peor memoria visual y l'hipotiroidismu con una peor memoria verbal. Sicasí, esto vamos tener que confirmalo con una amuesa más grande", sostien González Nosti.

L'estudiu "pequeñín" pasó a ser un proyectu de más valir, pal que pidieron subvención del Ministeriu y que van facer anque nun llogren la financiación pública. Va ser descriptivu, pero tamién de siguimientu, yá que cuenten caltener l'atención cuandu menos un par d'años sobre los pacientes.