Dos albergues de Villaviciosa, ente los más valoraos polos pelegrinos

El conceyu de Villaviciosa convirtióse nos últimos años nun referente pa los que s'embarquen na aventura de facer el Camín de Santiago. La bona acoyida por parte de los hospederos fai que los pelegrinos marchen encantaos, como s'espeya nes webs y páxines especializaes. Precisamente una d'elles, Gronze, presenta cada añu una llista de los albergues meyor valoraos polos sos usuarios. El trabayu constante fixo que dos de los albergues de Villaviciosa asitien ente los meyores del Camín del Norte. Son, concretamente, La Rectoral de Priesca, que terminó en segunda posición, y la Hospedería de Pion, que ye terceru. 

Pa escoyelos, la páxina tien un sistema d'encamientu esclusivu pa persones rexistraes col fin, según espliquen, de "evitar encamientos duplicaos y disponer de ferramientes pa detectar y esaniciar les non xenuines". L'añu pasáu contabilizáronse un total de 42.315 encamientos válidos, que depués se sopesen teniendo en cuenta, por casu, les places del albergue, l'antigüedá del usuariu que da la valoración o el númberu global d'encamientos.

El Camín de Santiago convirtióse nun importante motor turísticu pal conceyu maliayés. El Gobiernu local considéralu un "elementu central y vertebrador de la promoción y el desenvolvimientu turísticu, especialmente dende'l Xacobéu, que supunxo'l despegue definitivu de los caminos del Norte". Amás, como elementu diferenciador y venceyáu al xurásicu, Villaviciosa apostó por amestar l'itinerariu cola cultura acebachera.