La estadounidense Celanese va asitiar nel valle de Tamón de la mano de DuPont
El grupu texanu va instalar un centru de servicios n'Asturies n'apautando la compra del negociu de movilidá y materiales a la química de Delaware
La compañía estadounidense de materiales especiales Celanese Corporation va asitiar nel valle de Tamón (Carreño) en llegando a un alcuerdu cola multinacional norteamericana DuPont pa adquiri-y la mayor parte del negociu de movilidá y materiales (M&M), y que toma polímeros, resines y soluciones pa vehículos y otres aplicaciones. Cuéntase con que'l trespasu va quedar rematáu nel tramu final d'esti añu. Celanese va ser la octava compañía qu'aporta a Asturies y enraigona na rexón de la mano de DuPont.
A resultes de l'adquisición, Celanese, con sede n'Irving (Texas), va asumir a los emplegaos asturianos de DuPont qu'anguaño trabayen dende'l so centru de servicios de Tamón pal negociu de movilidá y materiales. Fontes de la operación confirmaron que la voluntá de Celanese ye establecese y permanecer n'Asturies con un centru de servicios propiu que dea sofitu a los centros fabriles que va incorporar. En medios consultaos avanzóse que'l cambiu de titularidá va afectar a unos 38 trabayadores asturianos de DuPont (fundamentalmente, de recursos humanos, contabilidá, compres, ventes y facturación), anque Celanese podría entamar les sos actividaes na rexón con 70 o 80 persones, previa contratación de personal de refuerzu. Estos datos nun fueron confirmaos en medios oficiales, que xulgaron prematuro definir el perímetru llaboral que va ser desagregáu.
DuPont, con sede en Delaware (EE XX), apautó'l vienres 18 la venta de gran parte del so negociu mundial de movilidá y materiales (les llínies de polímeros d'inxeniería, resines de rendimientu y soluciones avanzaes) a Celanese por 11.000 millones de dólares (9.701,7 millones d'euros). DuPont pretende desfacese nel primer trimestre de 2023 d'otra llínia de productu d'esta área de negociu: la del homopolímeru d'acetal, que se comercializa cola marca Delrin. Nesti casu entá se desconoz el comprador. Con estes desinversiones, DuPont va financiar l'anunciada compra de Roger Corporation y otres posibles fusiones y adquisiciones, mesmo que la recompra d'acciones propies. El restu del negociu de movilidá y materiales (les llínies de productu auto adhesivos, multibase y la marca Tedlar) van siguir en DuPont.
Un grupu con 25 factoríes
Celanese Corporation ye líder mundial en producción d'ácidu acéticu y monómeru d'acetatu de vinilu, entre otros productos químicos y materiales avanzaos. Con más de 7.700 empleos, tien 25 factoríes y seis centros d'investigación n'once países, fundamentalmente n'América del Norte, Europa y Asia. L'añu pasáu facturó 7.526, 7 millones d'euros, el 51% más qu'en 2020, y declaró un beneficiu de 1.671,3 millones d'euros, el 4,81% menos.
La compañía ye sucesora d'American Cellulose & Chemical Manufacturing, fundada en 1918. Celanese, que cotiza en Bolsa, produz materiales d'inxeniería avanzao (polímeros pa les industries automovilística, electrónica, telecomunicaciones y médica), ingredientes alimentarios, acetatu de celulosa y dellos de los sos derivaos, especialidaes industriales como emulsiones d'acetatu de polivinilu y productos químicos especiales como l'acetatu d'etilenvinilu) y la tecnoloxía TCX pa la producción d'etanol basáu n'hidrocarburos.
- Continúa el trasvase de médicos de la sanidad pública asturiana a la privada: estas son las especialidades más afectadas
- Estos son los descuentos en el peaje del Huerna (desde el primer viaje) que planea aplicar Transportes
- Cuatro nuevos diáconos se foguearán un año en una parroquia 'como ensayo al presbiterado
- Así funciona el servicio de buses que conecta Avilés y el valle del Nalón con el AVE
- Cuatro heridos en un accidente en el Huerna, a la altura del puente de Barrios de Luna
- Los alcaldes piden acortar trámites para captar inversiones y Barbón se muestra dispuesto a negociar en China la llegada de una fábrica de coches
- Ir al HUCA de madrugada, la vía cada vez más usada para una atención rápida: 'Las guardias de las noches se han vuelto muy complicadas
- Los socios de Aseava apuestan por pasar página y eligen presidente a Amable Fernández