David Artime publica "Cróniques d'un machista feminazi"

David Artime acaba de publicar con Hoja de Lata "Cróniques d'un machista feminazi". Trátase de la so tercer novela depués de "La bufanda" y "Incorrectos", dos de les obres de más éxitu de la lliteratura asturiana de los últimos años.

La novela, según indicaron dende Hoja de Lata, fala de Fran, un home qu'entama'l Movimientu Pagafantes Involuntariu, un movimientu social que nagua por que les muyeres se sientan seducíes por paisanos socialmente concienciaos y non polos descerebraos discípulos de Míster Polla.

"L'apaición de l'Asociación de Muyeres Violentes y los sos ataques terroristes contra los mayores cabezaleros del sexismu va arrastrar el tableru de la llucha pola igualdá de xéneros a una dimensión nueva y definitiva", indicaron

David Artime Coto (Candás, 1979) ye periodista y escritor. Ganador de dellos premios lliterarios, publicó "La bufanda" nel 2010, novela cola que ganó'l Premiu de Narraciones Trabe un añu enantes y que fala de la historia d'un ultra del Sporting que pierda la so bufanda nuna engarrada colos ultres d'un equipu rival.

Con 'Incorrectos' llevó'l Premiu de la Tertulia Malory al meyor llibru n'asturianu publicáu nel 2018. La novela narra la historia d'amor d'Aníbal, un violentu neonazi conocíu nel ambiente de la estrema derecha madrilana, y Maitane, una militante d'ETA implicada en dos asesinatos.