Talleres Alegría impulsa la rehabilitación de llocomotores en Llanera

La centenaria empresa familiar asturiana Talleres Alegría, especializada na fabricación, igua y caltenimientu de material ferroviario, y mui activa na construcción de vagones pal tresporte de mercancíes, ta potenciando como nueva área d'actividá la igua, caltenimientu y restauración de llocomotores pa compañíes ferroviaries. 

La demanda de llocomotores de segunda mano disparóse pol costu y el retrasu de los fabricantes en sirvir unidaes nueves, con una entrega al veceru que llega a axuntar dellos años de demoranza. Compañíes privaes de tresporte de mercancíes per ferrocarril y empreses constructores con actividá n'obra ferroviaria demanden llocomotores y tampoco pueden importase yá usaes d'otros países porque l'anchu ibéricu vixente na rede ferroviaria convencional española supon una llimitación insalvable pal usu de material rodante d'anchu internacional. 

Talleres Alegría entamó la restauración y caltenimientu de llocomotores p'atender una demanda creciente. Faelo la so filial Ferrovías Astur, de Llanera, especializada en material rodante autopropulsáu y na que dende va años el grupu fai caltenimientu y fabricación de dresines, maquinaria de construcción de víes y igua de material móvil. 

La compañía fai los trabayos de reconstrucción, caltenimientu y rehabilitación de llocomotores con unidaes de modelos y fabricantes diversos. 

Esta llinia de trabayu ta creciendo nel senu de Talleres Alegría al tiempu en qu'aumenta la demanda. En determinaos periodos, les llocomotores pendientes d'arreglu apecuñen na fábrica del grupu en Mieres enllenando l'espaciu que tien disponible Ferrovías Ástur. 

Talleres Alegría tien siete centros de producción: seis n'Asturies y ún n'Alcázar de San Juan (Ciudá Real). N'Asturies tien plantes de fabricación de material fixo de vía nel polígonu de Silvota (Llanera), de material rodante remolcáu n'Aboño (Carreño), de forxa d'agua pa los cambios de les esviadures de vía n'El Musel (Xixón), de material rodante autopropulsáu (Llanera), d'equipamientos de vía p'alta velocidá (Mieres) y un centru de rodaxe ferroviariu en Tremañes (Xixón).

“Cola ayuda del Gobiernu del Principáu d´Asturies”.