"Kneecap", cine gratis pol Día de la Llingua Materna

Cada 21 de febreru la comunidá internacional celebra'l Día de la Llingua Materna, una xornada pensada pa promocionar la diversidá llingüística y reflexonar sobre ella. Asturies cuenta con un tesoru idiomáticu representáu poles sos llingües propies, l'asturianu y el gallego-asturianu, elementos centrales de la nuestra identidá como pueblu. Ye por ello que queremos sumanos a esta efeméride y poner en valor les nuestres llingües, como espresion del nuestru pasáu, reflexu del nuestru presente y esperanza nel nuestru futuru. Col asturianu y el gallego-asturianu axuntámonos a la diversidá llingüística mundial y singularizámonos nel contestu internacional; sicasí, estes dos llingües trescienden el planu simbólicu y referencial, tamién tienen un aspectu de dinamización social y económica a tener en cuenta.

L'actividá xenerada alredor d'elles, n'estayes como la filolóxica, la educativa, la lliteraria, la cultural o la musical, afita la so relevancia y dexa a les clares que son ferramientes amañoses pa la cohesión social, l'emprendimientu, la creación artística y la implementaciòn de riqueza, material y inmaterial.

Dende'l Grupu Parllamentariu Mistu Covadonga Tomé queremos festexar el Día Internacional de la Llingua Materna con un actu lúdico-reivindicativu perespecial. Nél vamos facer l'estrenu n'Asturies de la película irlandesa 'Kneecap', que narra les aventures y desventures d'un grupu de rap que canta en gaélicu, y darréu entamamos un coloquiu con delles personalidaes del mundu de la cultura y la música n'Asturies. Vamos falar de cuestiones como la importancia de protexer y promocionar les nuestres llingües propies, de la politica llingüística que necesitamos, del aspectu económicu que lleven apareyaes o de la importancia de la música na tresmisión xeneracional. Convidamos al cine Embajadores, a una consumición y a festexar xuntos y xuntes la nuestra diversidá llingüística.

¡Bon Día de la Llingua Materna! ¡Oficialidá!